Македонска екипа на Ултра Треил ду Мон Блан 2018
Што е УТМБ?
Ултра Треил ду Мон Блан претставува една од најпознатите и најпрестижните трки во планинско и ултрамаратонско трчање на светско ниво. Истата се смета за неформално светско првенство во ултрамаратонско планинско трчање каде на 6 различни трки учествуваат преку 8000 тркачи од повеќе од 98 држави како и најелитните натпреварувачи.
Настанот е своевиден светски празник на планинското трчање, спортот и рекреацијата и авантуризмот кој се одвива во текот на цела недела на крајот од август секоја година во Шамони – центарот на планинскиот туризам во Алпите. Манифестацијата се состои од 6 трки со различни должини и тежини кои почнуваат од различно место околу масивот на Мон Блан, а сите финишираат во Шамони.
Покрај трките PTL (330km), TDS (120km), CCC (100km), OCC (51km), детската трка YCC (15km), круната на настанот е UTMB – трка во должина од 171 километар кој се смета за една од најпознатите во светот.
Самата трка е уникатна и единствена бидејќи нејзината патека минува низ три држави – Франција, Италија и Швајцарија, а преку многуте планински врвови, превои и патеки таа комплетно го заобиколува масивот Мон Блан. Стартот и финишот се во центарот на Шамони, а се минува и низ гратчињата Кормајер и Шампе Лак.
На оваа трка секоја година учествуваат 2500 учесници кои имаат 46 часа за да го направат овој подвиг. Меѓу овие учесници оваа година ќе се најдат и петтемина членови на тимот Трекс/ПСД Макпетрол: Жикица Ивановски, Александар Симјаноски, Игор Јовановски, Игор Пирковски и Никола Цицоски.
Техничките спецификации на трката – должина од 171 километар и висинска разлика од 10000 метри качување и спуштање говорат за екстремноста и тежината на патеката, како и за потребното ниво на спремност, издржливост и мотивираност на учесниците, а временските услови кои знаат да бидат непредвидливи може да допринесат до најразлични сценарија – од дожд, снег и ниски температури до навистина жешки услови со кои учесниците мора да се справат.
Македонско учество на УТМБ
Досега од нашата држава може да се каже дека имаме релативно мал број на учесници и финишери на оваа позната и атрактивна трка. Причините се повеќебројни: потребно е навистина високо ниво на психо-физичка спремност за некој воопшто да се нафати да го помине овој ултрамаратон, истиот бара собирање на одреден број на поени за квалификација – овие поени се собираат со учество на други светски ултрамаратони пред апликација за УТМБ. Тука се и финансиските фактори – за подготовките, опремата, учеството и целокупниот аранжман се потребни завидни финансиски средства.
Досега на УТМБ имаат учествувано само пет Македонци од кои три ја имаат финиширано целата патека:
2012 година – Трајче Панковски и Жикица Ивановски (скратена трка поради лошо време)
2014 – Светлана Стојановска – прв женски финишер, Жикица Ивановски и Јовица Јованчев – први финишери
2017 – Дејан Крле – не успева да ја заврши трката поради настинка
Од овие петмина, единствено екипата во 2014 година ја минува цела оригинална патека и ја финишира трката.
Оваа недела ќе се обидеме да пренесеме дел од атмосферата од настанот а повеќе информации истотака може да следите и на следниот Фејсбук настан.
Трката стартува на 31.08.2018 (петок) во 18:00 часот. Повеќе информации за истата може да пронајдете на официјалниот веб-сајт каде истотака ќе имате можност да ја следите трката во живо.
