Одземен брзинскиот рекорд на Пемба Шерпа на Еверест

Брзинските рекорди во искачување на големите врвови и други слични хронометарски активности во слабо контролирани услови (природа), неретко биле проследувани со извесни нерегуларности и доза на скептицизам. Последната променета одлука на полето на планинарењето и високогоството, му го одзема рекордот на Пемба Дорје Шерпа за искачувањето без кислород по јужното седло на Еверест во 2004 година. 

На кратко околу рекордите на оваа страна од Еверест: 

Стартната точка се смета Базниот камп на јужната страна на Еверест кој се наоѓа на височина од 5350 м.н.в откаде се минува низ четири висински кампови и се пристапува на јужното седло се до врвот – 8848 м.н.в. 

Во 2000 година Бабу Шерпа прави искачување со суплементарен кислород за 16 часа и 56 минути. Во 2003 година, гореспоменатиот Пемба Шерпа поставува ново најдобро време од 12 часа и 45 минути, за само три дена по него да дојде Лакпа Гелу Шерпа кој го руши овој рекорд со време од 10 часа и 56 минути. Пемба Шерпа покренува жалба за нерегуларност во рекордот, но неговата жалба е одбиена. 

Следната година, на 21 мај, Пемба Шерпа повторно прави обид и, наводно, се искачува за 8 часа и 10 минути, околу 3 часа побрзо од рекордот на Лакпа. Рекордот е усвоен и потврден од Министерството за култура и туризам на Непал и рекордот на Пемба стоеше скоро 14 години.

Сепак, Лакпа Шерпа никогаш не веруваше дека Пемба го има искачено врвот, па затоа тој и неговата фамилија покренаа судски спор. Како нерегуларности беа наведени повеќе фактори – искачувањето на Пемба во 2 часот наутро при исклучително лоши временски услови, недостатокот од фотографија од врвоткако и отсуството на официјални лица во базниот камп кои можат да сведочат за времето на неговото поаѓање. 

На почетокот од овој декември 2017 година, Врховниот суд во Непал повторно ја разгледа контроверзната случка со рекордот на Еверест и врз база на неоснованост и недостаток на докази пресуди да му го одземе рекордот на Пемба Шерпа. 

Врховниот суд истотака се изјасни дека Министерството за Култура и Туризам на Непал издало одобрение за искачен врв без соодветните докази – очевидец, фотографија или валиден ГПС запис. 

Рекордот за најбрзо искачување на Еверест од јужната страна, со суплементарен кислород сега припаѓа на Лакпа Гелу Шерпа – 10 часа и 56 минути. Tој истотака го има искачено Еверест 15 пати.