Дека-Ајронмен – објаснет од најмладиот женски финишер

Во август оваа година 22-годишната Лаура Кноблах од САД успеа да се запише во историјата како најмладата девојка која успеала да заврши еден дека-ајронмен – ултратриатлонска дисциплина која опфаќа врзување на 10 фул ајронмени. 

Што е „Дека Ајронмен”

Тоа е врста на екстремен ултратриатлон каде натпреварувачите во одреден временски период се обидуваат да изминат (испливаат, извозат и истрчаат) дистанци на 10 ајронмени заедно – односно вкупно 38 километри пливање, 1800 километри велосипед и 422 км трчање. 

Конкретно настанот каде настапуваше Кноблах беше т.н. „Швајцарска Ултра” која се одвива во Бухс, Швајцарија, а истиот има лимит од 14 дена за комплетирање. Во настанот постојат и други категории каде дека-ајронменот е распореден на 10 дена (по еден во ден), како и има трка во 5 засебни денови. 

Иако младата Лаура претходно имала одлични искуства со повеќе маратони, двојни и тројни ајронмени, сепак десетката е нешто сосема поинаку. Во подолниот текст таа раскажува за одделните партии од трката: 

Пливање 

„Дехидрирана и потполно истоштена седев во кабината за туширање и не бев сигурна дали воопшто ќе можам да ги облечам панталоните. Само што испливав 38 километри и не знам како ќе успеам да продолжам.” 

Пливањето е првата партија од ултра-триатлонот. Учесниците имаат 25 часа за да ги комплетираат 750 кругови по 50 метри. Лаура овој дел го заврши за 19 часови. 

Велосипед 

По неколку часа одмор време беше за старт на возењето велосипед. Овој сегмент се состоеше од 200 кругови долги 9 км крај реката Рајна. Должината од 1800 километри и одзема многу повеќе време на младата Американка. 

Таа возеше велосипед по околу 270 километри на ден честопати во борба со заморот и со заспивањето буквално на волан. Сепак, ова и беше нејзина најсилна страна па затоа нејзиниот план беше да пртисне и да го заврши колку што може побргу за да има доволно простор за следните х10 маратони. 

Трчање

Со една недела до завршување на лимитот, Лаура го започна трчањето на 422 километри долгата дистанца или околу 330 кругови долги околу 1,25 км. Круговите (за трчање и велосипедизам) се направени непосредно блиску од старт-финиш зоната како би се имала полесна логистика за натпреварувачите – храна, пијалоци и помош. 

Транзицијата помеѓу велосипед и трчање Лаура ја поднесе далеку полесно отколку првата. Првите неколку дена таа одеше со споро темпо (повеќе одење) паралелно со слушање на музика, аудио-книги како и телефонски разговори за дигање на моралот. 

На третиот ден таа почна да трча за на крајот да успее успешно да го заврши ова долго и напорно натпреварување. „Ваквите настани целосно те раслојуваат и те доведуваат во можност навистина да се погледнеш себеси” – вели Лаура. 

Таа заврши за вкупно време од 320 часа 40 минути и 30 секунди и од пријавените 4 жени таа беше последна, но сепак и најмлада која успева да заврши ваков ултратриатлон. 

На натпреварувањето учествуваа и уште 12 мажи, а првото место го освои Унгарецот Ференц Сизони со време од 219 часа 7 минути и 12 секунди. Интернационалната Ултратриатлон Асоцијација е одговорна за раководење на овој тип на ултра-натпреварувања и тестови на издржливост, а низ светот веќе постојат се повеќе вакви трки и се повеќе луѓе кои сакаат да се испробаат. 

Колку за информација, ова не е најдолгата дистанца во ултра-триатлоните. Постои и дабл-дека како и трипл-дека. 

Повеќе за искуството на Лаура читајте на нејзиниот личен блог. 

Ова е нејзиниот Инстаграм