Зимски Отворен Сквош Турнир 2014

Турнирот се одржа на терените на Сквош Центар во Скопје во организација на сквош клубот Винус од Скопје, со учество на 10 натпреварувачи. Освен Mакедонци, учествуваа и Aмериканец и Украинец. Турнирот беше организиран како хибрид од групен систем на почеток и елиминации од четвртфиналето натаму. Се разврзуваше за пласман за сите места, и сите учесници играа по 7 натпревари.

Оваа година, леворакиот Стефан Шишовски за првпат стана победник на едно сквош натпреварување во Македонија. Тој го надгради својот сребрен медал од премиерниот зимски турнир од 2013г. со победа од 3:2 над Кирил Сотировски во драматично финале. Во натпреварот за трето место, Ивица Кондев беше поконцентриран од американецот Марк Ласер (Mark Lasser) и победи со 3:0.

Финалето изобилуваше со долги поени, големи пресврти и одлична техника од двајцата финалисти. Трикратниот државен шампион Сотировски на два пати водеше, со 1:0 и 2:1 во сетови, и кога се очекуваше рутинско доведување на мечот до крај, расположениот и мотивиран Шишовски наоѓаше начини и сила да ја надомести негативата и да се избори за петти сет.

И во петтиот сет тој беше во значителна негатива од 7:3 во поени, но беше одлично психички подготвен и иако на крајот од силите, сепак славеше со 11:9. Главна карактеристика на финалето беше неговата упорност и ангажираност во сите поени, а често пати, иако поените ги диригираше противникот, Шишовски со одлична дефанзива и брзи контраудари одржуваше чекор и освојуваше важни поени.

На тој начин Шишовски на најдобар начин му се реваншира на Сотировски за поразот во групната фаза, кога иако водеше со 2:0 во сетови, сепак загуби со 2:3. После поразот од Павковиќ во минатогодишното финале по водство од 2:1 и неискористена меч топка во четвртиот сет, ова беше најубав доказ за неговиот голем напредок и на психолошки план. Мечот за трето место се одликуваше со тактичко надмудрување на Кондев и Ласер и нивна борба за заземање на централната позиција на теренот.

Кондев успешно изнаоѓаше начини да ја анулира доминацијата на американецот преку позиционата игра, најмногу со поголема агилност, но беше и истраен да не му дозволи на Ласер со таква игра сосема да му го одземе ритамот и позицијата. Иако победата е максимална во сетови, мечот беше изедначен и исцрпувачки за обајцата. Покрај Шишовски, за откритие на турнирот може да се смета и Кондев, кој има голем напредок, како кондиционо, така и на психолошки и на технички план.

Повремениот репрезентативец на Македонија има специфичен стил на игра со многубројни скратени топки, често пати беспрекорно изведени и за противниците тешки за предвидување. Турнирот во целост беше со многу изедначен квалитет, за што говори фактот што второпласираниот и третопласираниот од Купот на Македонија од ноември 2013г., Калеовски и Панев, кој е и вицешампион од минатогодишното државно првенство (април 2013г.), мораа да се задоволат со разигрување за петто и шесто место.

Во тој релативно изедначен меч, Калеовски победи со 3:1 и со тоа ја потврди победата од 3:2 над истиот противник во групната фаза на турнирот. Со освоено седмо место, резултатски потфрли и Златко Крстевски, кој беше четврти на Купот на Македонија за 2013г.

Турнирот ќе беше веројатно досега најквалитетниот одржан во Македонија, доколку немаше откажувања во последен момент на неколкумина солидни играчи од Македонија и од странство (Кире Крстевски, Ѓоко Петковски, Ѓоко Поповиќ, Коен Гриепсма (Coen Griepsma), Франческо Кото (Francesco Coto), Михајло Ристески).

Финале – Стефан Шишовски 3:2 Кирил Сотировски

Меч за трето место – Ивица Кондев 3:0 Марк Ласер

Полуфинални мечеви – Кирил Сотировски 3:0 Марк Ласер Стефан Шишовски 3:1 Ивица Кондев

Конечен пласман
1 . Стефан Шишовски
2 . Кирил Сотировски
3 . Ивица Кондев
4 . Марк Ласер (Mark Lasser)
5 . Бранко Калеовски
6 . Горан Панев
7 . Златко Крстевски
8 . Живко Котевски
9 . Андриј Коменко
10. Дарко Црвенковски